واشنگٹن: امریکا میں وسط مدتی انتخابات آج 3 نومبر کو منعقد ہوں گے، جن میں ایوانِ نمائندگان اور سینیٹ کی نشستوں کے لیے ووٹنگ ہوگی۔ انتخابات میں ری پبلکن اور ڈیموکریٹک جماعتوں کے درمیان کانگریس میں اکثریت حاصل کرنے کے لیے مقابلہ ہوگا۔
انتخابات میں امریکی صدر ڈونلڈ ٹرمپ کی حکومت کی کارکردگی بھی عوامی توجہ کا مرکز ہے۔ تجزیہ کاروں کے مطابق مہنگائی، ایندھن کی بڑھتی قیمتیں اور ایران کے ساتھ جنگ سمیت مختلف معاملات ووٹرز کے فیصلوں پر اثر انداز ہوسکتے ہیں۔
رائٹرز اور اِپسوس کے تازہ سروے کے مطابق کانگریس میں اکثریت کے حوالے سے ڈیموکریٹس کو ری پبلکنز پر 8 پوائنٹس کی برتری حاصل ہے۔ سروے میں 46 فیصد افراد نے ڈیموکریٹس جبکہ 38 فیصد نے ری پبلکنز کی حمایت کی۔
ایوانِ نمائندگان کی تمام 435 نشستوں جبکہ سینیٹ کی 100 میں سے 35 نشستوں پر انتخابات ہوں گے۔ اس کے علاوہ 36 امریکی ریاستوں میں گورنرز کا انتخاب بھی کیا جائے گا۔
فی الحال ری پبلکنز کو کانگریس کے دونوں ایوانوں میں اکثریت حاصل ہے، تاہم ڈیموکریٹس کی جانب سے ایوانِ نمائندگان میں اکثریت حاصل کرنے کی کوششیں جاری ہیں۔
انتخابی نتائج سے امریکی کانگریس میں سیاسی طاقت کا توازن تبدیل ہونے کا امکان ہے، جبکہ بعض سخت مقابلے والی نشستوں کے نتائج سامنے آنے میں کئی گھنٹے یا دن بھی لگ سکتے ہیں۔
