نائب وزیرِ اعظم و وزیرِ خارجہ اسحاق ڈار نے اسلام آباد میں ہاکان فیدان (ترکیہ) اور بدر عبدالعاطی (مصر) سے الگ الگ ملاقاتیں کیں، جن میں دوطرفہ تعلقات اور خطے کی صورتحال پر بات چیت کی گئی۔
ترکیہ کے وزیر خارجہ کے ساتھ ملاقات میں دونوں رہنماؤں نے پاکستان اور ترکیہ کے دیرینہ اور برادرانہ تعلقات کو مزید مضبوط بنانے کے عزم کا اعادہ کیا۔ انہوں نے مختلف شعبوں میں تعاون بڑھانے اور اسٹریٹجک شراکت داری کو وسعت دینے پر اتفاق کیا، جبکہ علاقائی حالات خصوصاً ایران کی صورتحال پر بھی تبادلہ خیال کیا گیا۔
دوسری جانب مصر کے وزیر خارجہ کے ساتھ ملاقات میں دوطرفہ تعلقات، تجارت، سرمایہ کاری اور مختلف شعبوں میں تعاون کو فروغ دینے پر زور دیا گیا۔ دونوں ممالک نے مشترکہ کمیشن اور کاروباری روابط کو فعال بنانے پر اتفاق کیا۔
ملاقات میں صحت کے شعبے، خاص طور پر ہیپاٹائٹس سی کے خلاف اقدامات میں مصر کے تعاون کو سراہا گیا، جبکہ دفاعی اور سیکیورٹی تعاون کو مزید مضبوط بنانے پر بھی اتفاق ہوا۔
رہنماؤں نے مشرق وسطیٰ کی صورتحال پر گفتگو کرتے ہوئے کشیدگی میں کمی، مذاکرات اور سفارت کاری کی اہمیت پر زور دیا۔ پاکستان نے فلسطینی عوام کی حمایت کا اعادہ کرتے ہوئے غزہ اور مغربی کنارے میں جاری کارروائیوں کی مذمت کی، جبکہ مصر کے انسانی امدادی کردار کو سراہا گیا۔
دونوں ممالک نے اقوام متحدہ اور اسلامی تعاون تنظیم سمیت عالمی فورمز پر تعاون جاری رکھنے پر بھی اتفاق کیا۔
