تربت: کور کمانڈر بلوچستان لیفٹیننٹ جنرل عنایت حسین نے کہا ہے کہ بلوچستان سے میرا گہرا لگاؤ ہے، صوبے میں پائیدار امن کا قیام ہماری اولین ترجیحات میں شامل ہے۔ بارڈر تجارت کے فروغ اور سرحدی راستے کھولنے سے مقامی عوام کو روزگار کے مواقع میسر آئیں گے اور ان کی معاشی حالت بہتر ہوگی۔
ان خیالات کا اظہار انہوں نے تربت میں منعقدہ عوامی کھلی کچہری سے خطاب کرتے ہوئے کیا۔ کور کمانڈر نے کہا کہ ہماری خواہش ہے کہ سرحدوں کو تجارت کے لیے کھولا جائے تاکہ مقامی لوگوں کو کاروبار اور روزگار کے مواقع ملیں اور وہ خوشحال زندگی گزار سکیں۔ ہم بندوق کے کلچر کا خاتمہ کرکے بلوچستان کو امن، ترقی اور خوشحالی کی راہ پر گامزن کرنا چاہتے ہیں۔
انہوں نے کہا کہ بلوچستان میں جاری ترقیاتی منصوبوں کو جلد مکمل کیا جائے گا، جبکہ سیکیورٹی مسائل سے دوچار علاقوں میں بھی ترقیاتی سرگرمیاں جاری رکھی جائیں گی تاکہ عوام کو بنیادی سہولیات فراہم کی جا سکیں۔
کور کمانڈر کا کہنا تھا کہ بلوچستان کے عوام ہمارے شانہ بشانہ کھڑے ہیں اور پاک فوج بھی ہر مشکل وقت میں عوام کے ساتھ ہے۔ عوام اور سیکیورٹی فورسز کے درمیان باہمی اعتماد، تعاون اور یکجہتی صوبے میں امن و استحکام کے لیے بنیادی اہمیت رکھتے ہیں۔
انہوں نے مزید کہا کہ بارڈر تجارت کے راستے کھولنے اور تجارتی سرگرمیوں کو فروغ دینے سے مقامی کاروبار میں اضافہ ہوگا اور علاقے کی معاشی صورتحال بہتر ہوگی۔ بلوچستان کے روشن مستقبل کے لیے نوجوانوں کو ترقی کے مواقع فراہم کرنا اور عوام کو معاشی طور پر مستحکم بنانا ضروری ہے۔
عوامی کھلی کچہری میں ضلع کیچ، تمپ اور پنجگور کے قبائلی عمائدین، معززین اور مختلف شعبہ ہائے زندگی سے تعلق رکھنے والے افراد نے شرکت کی۔ اس موقع پر آئی جی ایف سی ساؤتھ بلوچستان میجر جنرل ظفر اقبال، آئی جی پولیس بلوچستان سمیت دیگر اعلیٰ حکام بھی موجود تھے۔
