جھل مگسی ڈیزرٹ جیپ ریلی 2025 شاندار، رنگا رنگ اور منظم تقریبات کے ساتھ اختتام پذیر ہو گئی۔ ریلی کے دوران منعقدہ چیلنج آف روڈ مقابلے انتہائی سنسنی خیز اور دلچسپ ثابت ہوئے، جہاں مختلف کیٹیگریز میں حصہ لینے والے ڈرائیورز نے اپنی غیر معمولی مہارت، رفتار اور جرات کا شاندار مظاہرہ کیا۔
ریلی میں مجموعی طور پر 51 ڈرائیورز نے شرکت کی، جن میں دو خواتین ریسر بھی شامل تھیں۔ مقابلے نہایت سخت، کانٹے دار اور جوش و خروش سے بھرپور رہے، جس نے شائقین کو آخر تک محظوظ کیے رکھا۔
ریلی کے اختتامی مرحلے پر مہمان خصوصی گورنر بلوچستان شیخ جعفر خان مندوخیل نے مختلف کیٹیگریز کے فاتح ریسرز میں انعامات تقسیم کیے اور کامیاب ڈرائیورز کی کارکردگی کو سراہا۔
ریلی کے دوران سیکیورٹی کے فول پروف انتظامات ایف سی بلوچستان نارتھ اور ضلعی سول انتظامیہ کے باہمی تعاون سے کیے گئے، جس کی بدولت ایونٹ نہایت پرامن، محفوظ اور منظم انداز میں اختتام پذیر ہوا۔
جھل مگسی ڈیزرٹ جیپ ریلی 2025 نے نہ صرف موٹر اسپورٹس کو فروغ دیا بلکہ علاقے کی مثبت شناخت، امن و امان اور سیاحت کے فروغ میں بھی اہم کردار ادا کیا۔
