عمران خان کے بلڈ پریشر اور برین ہیمرج کے خطرے کا معاملہ عدالت پہنچ گیا، وکلا کو جیل ملاقات کی اجازت
پاکستان تحریکِ انصاف کے بانی عمران خان کی صحت سے متعلق تشویش کا معاملہ اسلام آباد ہائیکورٹ میں زیرِ بحث آیا، جہاں ان کے وکیل بیرسٹر سلمان صفدر نے عدالت کو بتایا کہ جیل میں ان کا بلڈ پریشر معمول کے مطابق نہیں اور برین ہیمرج کا خدشہ بھی موجود ہے۔ اس صورتحال کے بعد اسلام آباد ہائیکورٹ نے عمران خان اور ان کی اہلیہ بشریٰ بی بی کے وکلا کی ملاقاتوں کے لیے ہدایات جاری کردیں۔
منگل کے روز اسلام آباد ہائیکورٹ میں 190 ملین پاؤنڈ کیس میں عمران خان اور بشریٰ بی بی کی سزاؤں کے خلاف دائر اپیلوں کی سماعت ہوئی۔ چیف جسٹس سردار محمد سرفراز ڈوگر اور جسٹس محمد آصف پر مشتمل دو رکنی بینچ نے کیس کی سماعت کی، جس کے دوران ملزمان کے وکلا اور نیب پراسیکیوٹر کے درمیان مختلف قانونی نکات پر سخت جملوں کا تبادلہ بھی ہوا۔
کارروائی کے آغاز پر وکیل لطیف کھوسہ نے مؤقف اختیار کیا کہ عدالت کی جانب سے ملاقات کا حکم جاری ہونے کے باوجود ان کی اپنے مؤکلین سے ملاقات نہیں کروائی گئی۔ اس پر چیف جسٹس نے وضاحت کی کہ عدالت نے دراصل بیرسٹر سلمان صفدر کی ملاقات کا حکم دیا تھا۔
چیف جسٹس نے ایڈووکیٹ جنرل اسلام آباد سے دریافت کیا کہ کیا لطیف کھوسہ کی عمران خان اور بشریٰ بی بی سے آئندہ ایک یا دو روز میں ملاقات ممکن بنائی جا سکتی ہے؟ اس موقع پر انہوں نے کہا کہ اگر ملاقات کے راستے میں کوئی رکاوٹ موجود ہے تو اسے دور کیا جانا چاہیے۔
سماعت کے دوران عمران خان اور بشریٰ بی بی کی طبی صورتحال بھی زیرِ بحث آئی۔ بیرسٹر سلمان صفدر نے عدالت کو آگاہ کیا کہ عمران خان کی بینائی کی کیفیت میں کچھ بہتری ضرور آئی ہے، تاہم ان کا بلڈ پریشر تاحال قابو میں نہیں اور برین ہیمرج کے خدشے سے بھی آگاہ کیا گیا ہے۔
بشریٰ بی بی کی صحت کے حوالے سے وکیل نے بتایا کہ ان کی آنکھ کی حالت تشویشناک ہے اور انجری کے آثار بھی دکھائی دے رہے ہیں۔ ان کے مطابق تقریباً چھ ماہ قبل انہیں سرجری کے لیے اسپتال منتقل کیا گیا تھا، جبکہ 15 نومبر کو دوبارہ آپریشن متوقع ہے۔ وکیل نے مؤقف اختیار کیا کہ جیل میں ان کا مناسب علاج ممکن نہیں، لہٰذا انہیں علاج کی غرض سے ضمانت دی جائے اور طبی معائنے کے لیے میڈیکل بورڈ قائم کیا جائے۔
دوسری جانب ایڈووکیٹ جنرل اسلام آباد نے عدالت میں حکومتی رپورٹ پیش کرتے ہوئے وکلا کی جانب سے اٹھائے گئے طبی سہولیات سے متعلق تحفظات کی تردید کی۔ ان کا کہنا تھا کہ حکومت قیدیوں کی صحت اور علاج کے حوالے سے اپنی ذمہ داریاں پوری کر رہی ہے اور بشریٰ بی بی کو جیل میں ضروری طبی سہولیات مہیا کی جا رہی ہیں۔
انہوں نے مزید بتایا کہ 8 نومبر کو بھی بشریٰ بی بی کا میڈیکل بورڈ کے ذریعے معائنہ کیا گیا تھا اور اس سلسلے میں سپریم کورٹ کی ہدایات پر عمل درآمد جاری ہے۔
اپیلوں کی تیاری سے متعلق بیرسٹر سلمان صفدر نے عدالت کو بتایا کہ انہیں عمران خان سے تقریباً سات ماہ جبکہ بشریٰ بی بی سے گیارہ ماہ کے وقفے کے بعد ملاقات کا موقع ملا ہے۔ اب انہیں اپنے مؤکلین کی جانب سے اپیلوں پر دلائل دینے کی ہدایات موصول ہوچکی ہیں، تاہم کیس کے کاغذات اور پیپر بکس کا جائزہ لینے کے لیے مزید مہلت درکار ہے۔
نیب پراسیکیوٹر نے مزید وقت دینے کی درخواست پر اعتراض اٹھاتے ہوئے کہا کہ ملزمان کی جانب سے طویل عرصے سے نیب کو تنقید کا نشانہ بنایا جا رہا ہے اور اب اپیلوں کی سماعت میں مزید تاخیر کے لیے وقت مانگا جا رہا ہے۔
چیف جسٹس نے ریمارکس دیے کہ اپیلوں کو دائر ہوئے ایک سال سے زیادہ عرصہ گزر چکا ہے، تاہم عدالت ملزمان کے وکلا کو تیاری کے لیے مناسب وقت فراہم کرنے کے حق میں ہے۔ عدالت نے یہ بھی واضح کیا کہ اب اپیلوں پر حتمی دلائل شروع کرنا ضروری ہوچکا ہے۔
سماعت کے اختتام پر اسلام آباد ہائیکورٹ نے لطیف کھوسہ کی عمران خان اور بشریٰ بی بی سے کم از کم ایک گھنٹے کی جیل ملاقات یقینی بنانے کا حکم دیا۔ عدالت نے ایڈووکیٹ جنرل اسلام آباد کو ہدایت کی کہ ملاقات کا انتظام جلد مکمل کیا جائے تاکہ آئندہ ہفتے سے 190 ملین پاؤنڈ کیس میں سزا کے خلاف دائر اپیلوں پر باقاعدہ حتمی دلائل شروع کیے جا سکیں۔
عدالت نے کیس کی مزید کارروائی مقررہ طریقہ کار کے مطابق آگے بڑھانے کی ہدایت کرتے ہوئے سماعت ملتوی کردی۔
