سیکورٹی فورسز کا ژوب میں آپریشن، مزید 14 دہشت گرد ہلاک، دو روز میں تعداد 47 ہوگئی

بلوچستان کے ضلع ژوب کے علاقے سمبزہ میں 7 اور 8 اگست 2025 کو سیکورٹی فورسز کی کامیاب کارروائی میں 33 دہشت گردوں کی ہلاکت کے بعد 8 اور 9 اگست کی درمیانی شب پاک-افغان سرحد کے قریب ایک مزید کلیئرنس آپریشن کیا گیا، جس میں مزید 14 بھارتی حمایت یافتہ دہشت گرد مارے گئے۔
پاک فوج کے شعبہ تعلقات عامہ (آئی ایس پی آر) کے مطابق، انسداد دہشت گردی کی اِن دو روزہ کارروائیوں میں ہلاک ہونے والے دہشت گردوں کی کُل تعداد 47 تک پہنچ گئی ہے۔
ترجمان پاک فوج کے مطابق ہلاک دہشت گردوں کے قبضے سے اسلحہ، گولہ بارود اور دھماکہ خیز مواد بھی برآمد ہوا۔
7 اور 8 اگست کی درمیانی شب ژوب میں سیکورٹی فورسز نے افغان سرحد سے دہشت گردوں کی درانداری کی کوشش ناکام بنائی اور بڑی کارروائی کرتے ہوئے 33 بھارتی حمایت یافتہ خوارج کو ہلاک کردیا۔
آئی ایس پی آر کے مطابق 7 اور 8 اگست کی درمیانی شب پاک افغان سرحد پر بڑی تعداد میں خوارج کی نقل وحرکت پکڑی گئی تھی۔
آئی ایس پی آر نے بتایا کہ بھارتی پراکسی فتنہ الخوارج کے دہشت گرد ضلع ژوب کے علاقے سمبازه سے پاکستان میں داخل ہونے کی کوشش کررہے تھے۔ تاہم، سیکورٹی فورسز نے بروقت اور مؤثر کارروائی کرتے ہوئے دراندازی کی کوشش ناکام بنا دی ہے۔
ترجمان پاک فوج نے بتایا کہ سیکورٹی فورسز کے جرات مندانہ اور مؤثر آپریشن کے نتیجے میں 33 بھارتی حمایت یافتہ خوارج مارے گئے۔
بعدازاں، اور 9 اگست کی درمیانی شب پاک-افغان سرحد کے قریب ایک مزید کلیئرنس آپریشن کیا گیا جس میں مزید 14 خوارج ہلاک ہوئے اور دو روزہ آپریشن میں مارے گئے دہشت گردوں کی تعداد 47 تک پہنچ گئی۔
ترجمان پاک فوج نے واضح کیا کہ پاکستان کی سیکیورٹی فورسز ملکی سرحدوں کے دفاع اور بھارتی سرپرستی میں جاری دہشتگردی کا مکمل خاتمہ کرنے کے لیے پرعزم اور پوری طرح تیار ہیں۔
ترجمان کا کہنا ہے کہ پاک فوج ملک کی سرحدوں کے تحفظ، اور امن، استحکام اور ترقی کو سبوتاژ کرنے کی کوششوں کو ناکام بنانے کے لیے پرعزم ہے۔
وزیراعظم کا خراج تحسین
دوسری جانب وزیراعظم شہباز شریف نے ژوب میں کامیاب کارروائی پر سیکیورٹی فورسز کو خراج تحسین پیش کیا اور کارروائی میں 33 خوارجی دہشت گردوں کی ہلاکت پر سیکیورٹی فورسز کی ستائش کی ہے۔
وزیراعظم نے کہا کہ سیکیورٹی فورسز نے جان پر کھیل کر دہشت گردوں کی در اندازی ناکام بنائی، دہشت گردی کے خلاف جنگ میں پوری قوم سیکیورٹی فورسز کے ساتھ ہے، ملک سے ہر قسم کی دہشت گردی کے مکمل خاتمے کیلئے پرعزم ہیں۔
صدرِ مملکت کا خراج تحسین
صدرِ مملکت آصف علی زرداری نے ژوب میں 33 خوارج کو جہنم واصل کرنے پر پاک فوج کو خراجِ تحسین پیش کیا ہے۔
آصف زرداری نے کہا کہ پاک فوج کی جرأت، مہارت اور بروقت کارروائی قابلِ فخر ہے، پاکستانی سرزمین پر دراندازی کی ہر کوشش کا منہ توڑ جواب دیا جائے گا، پاکستان بھارتی سرپرستی میں ہونے والی دہشت گردی کا قلع قمع کرے گا۔
صدرِ مملکت نے مزید کہا کہ پوری قوم اپنی افواج کے شانہ بشانہ کھڑی ہے، دہشت گردی کے مکمل خاتمے تک یہ جنگ جاری رہے گی۔
وزیر داخلہ کا خراج تحسین
وفاقی وزیرداخلہ محسن نقوی نے ژوب میں دہشت گردوں کے خلاف کامیاب کارروائی پر سیکیورٹی فورسز کو خراج تحسین پیش کیا ہے۔
محسن نقوی نے کہا کہ سیکیورٹی فورسز نے فتنہ الہندوستان کے 33 دہشت گردوں کوجہنم واصل کیا، دہشت گردوں کو عبرتناک انجام تک پہنچا کر سیکیورٹی فورسز نے کامیابی حاصل کی، فتنہ الہندوستان کے دہشت گردوں کا انجام عبرتناک موت ہے۔