تلاشی کے نام پر کسٹم اور کوسٹ گارڈز کا ناروا عمل زمینداروں کا معاشی قتلِ عام ہے، پشتونخوا ملی عوامی پارٹی

کوئٹہ: پشتونخوا ملی عوامی پارٹی نے تلاشی کے نام پر کسٹم اور کوسٹ گارڈز کے مبینہ ناروا رویے پر تشویش کا اظہار کرتے ہوئے کہا ہے کہ اس طرزِ عمل سے زمینداروں اور عام عوام کو شدید مشکلات کا سامنا کرنا پڑ رہا ہے۔
پارٹی کی جانب سے جاری بیان میں کہا گیا کہ زمیندار پہلے ہی مختلف معاشی مسائل سے دوچار ہیں، جبکہ راستوں پر غیرضروری رکاوٹوں اور مبینہ ہراسانی کے باعث ان کے کاروبار اور زرعی پیداوار کو نقصان پہنچ رہا ہے۔
بیان میں الزام عائد کیا گیا کہ متعلقہ اداروں کی عدم توجہی، مبینہ کرپشن اور لوٹ مار کے باعث عوام کو شدید نقصان پہنچ رہا ہے۔ پارٹی نے مطالبہ کیا کہ تلاشی کے عمل کو قانون اور شہریوں کے احترام کے تقاضوں کے مطابق بنایا جائے۔
پشتونخوا ملی عوامی پارٹی نے کہا کہ عوام خصوصاً زمینداروں کو درپیش مسائل کا فوری ازالہ کیا جائے اور سرکاری اداروں کے اہلکاروں کے طرزِ عمل کی نگرانی کے لیے مؤثر اقدامات کیے جائیں۔
پارٹی نے حکام سے مطالبہ کیا کہ عوام کو غیرضروری مشکلات سے بچانے، زمینداروں کے معاشی مفادات کے تحفظ اور اداروں میں شفافیت یقینی بنانے کے لیے عملی اقدامات کیے جائیں۔