چلتن ہاؤسنگ سکیم فائرنگ کیس: ایک شخص جاں بحق، ملزم کی تلاش جاری، ڈی آئی جی کوئٹہ کا نوٹس

چلتن ہاؤسنگ سکیم میں فائرنگ کے واقعے پر ڈی آئی جی کوئٹہ عمران شوکت نے فوری نوٹس لیتے ہوئے واقعے کی جامع اور شفاف تحقیقات کا حکم دے دیا ہے۔ ابتدائی رپورٹ کے مطابق واقعہ اس وقت پیش آیا جب فائرنگ کے نتیجے میں ایک شخص جاں بحق اور دو افراد زخمی ہوگئے۔
پولیس کے مطابق جاں بحق ہونے والے شخص کی شناخت عامر ولد محمد حسن کے نام سے ہوئی ہے جبکہ زخمیوں میں شاہین ولد اسد اللہ اور جہانزیب ولد محمد حسن شامل ہیں۔ واقعے کی سنگینی کے پیش نظر قانون نافذ کرنے والے ادارے فوری طور پر حرکت میں آ گئے ہیں۔
ذرائع کے مطابق فائرنگ میں ملوث ملزم ایان احمد، جو وومن پولیس اسٹیشن کی ایس ایچ او زرغونہ منظور کا بیٹا ہے، واقعے کے بعد سے فرار ہے۔ پولیس نے ملزم کی گرفتاری کے لیے مختلف علاقوں میں چھاپہ مار کارروائیاں شروع کر دی ہیں۔
ڈی آئی جی کوئٹہ عمران شوکت نے واقعے کے بعد ایس ایچ او زرغونہ منظور کو ٹرانسفر کرنے کے احکامات بھی جاری کیے ہیں تاکہ تفتیش پر کسی قسم کا دباؤ یا اثرانداز ہونے کا امکان ختم کیا جا سکے۔
ڈی آئی جی نے واضح کیا ہے کہ واقعے کی غیر جانبدار اور میرٹ پر مبنی تحقیقات کی جائیں گی اور جو بھی اس واقعے میں ملوث پایا گیا اسے قانون کے مطابق سخت کارروائی کا سامنا کرنا پڑے گا۔