چمن میں کھلونہ نما شے میں نصب بم کا دھماکہ: ایک بچہ جاں بحق، پانچ زخمی

پرانا چمن کے رہائشی علاقے میں ہفتہ کے روز کھیلونہ نما شے میں نصب بم پھٹنے سے ایک کمسن بچہ جاں بحق جبکہ پانچ دیگر بچے شدید زخمی ہوگئے۔ پولیس اور ہسپتال ذرائع کے مطابق دھماکہ اس وقت ہوا جب بچے گھر کے باہر کھیلتے ہوئے پانی کی ترماز جیسی ایک مشتبہ شے اٹھا کر گھر لے آئے۔متاثرہ بچوں کے والد کے مطابق بچوں کو گلی میں کھیل کے دوران ایک کھلونے سے مشابہ شے ملی جسے وہ گھر لے آئے۔ جیسے ہی اسے کھولنے کی کوشش کی گئی تو زور دار دھماکہ ہوا جس سے گھر میں کہرام مچ گیا۔ دھماکے کی آواز دور دور تک سنی گئی اور اہلِ محلہ بڑی تعداد میں موقع پر جمع ہوگئے۔ریسکیو ٹیموں نے فوری طور پر زخمی بچوں کو ڈسٹرکٹ ہیڈکوارٹر ہسپتال منتقل کیا جہاں ابتدائی طبی امداد کے بعد پانچ زخمیوں کی حالت تشویشناک بتاتے ہوئے انہیں Quetta ریفر کر دیا گیا۔ ہسپتال انتظامیہ کے مطابق زخمی بچوں کو جسم کے مختلف حصوں پر شدید چوٹیں اور جلنے کے زخم آئے ہیں۔پولیس ذرائع کا کہنا ہے کہ ابتدائی تحقیقات کے مطابق دھماکہ خیز مواد ایک کھلونے جیسی شے میں نصب تھا۔ بم ڈسپوزل اسکواڈ نے جائے وقوعہ سے شواہد اکٹھے کر کے مزید تفتیش شروع کر دی ہے۔ واقعے کے بعد علاقے کو گھیرے میں لے کر سرچ آپریشن بھی کیا گیا۔مقامی عمائدین اور شہریوں نے واقعے کی شدید مذمت کرتے ہوئے مطالبہ کیا ہے کہ رہائشی علاقوں میں سیکیورٹی مزید سخت کی جائے اور ذمہ دار عناصر کو فوری گرفتار کر کے قرار واقعی سزا دی جائے۔ عوامی حلقوں کا کہنا ہے کہ معصوم بچوں کو نشانہ بنانا کھلی دہشت گردی ہے جس کی جتنی بھی مذمت کی جائے کم ہے۔واضح رہے کہ سرحدی شہر چمن میں ماضی میں بھی امن و امان کی صورتحال چیلنج رہی ہے، تاہم حالیہ واقعے نے ایک بار پھر شہریوں میں خوف و ہراس پیدا کر دیا ہے۔ پولیس کا کہنا ہے کہ واقعے کی ہر پہلو سے تحقیقات جاری ہیں اور جلد حقائق سامنے لائے جائیں گے