کراچی: سرکاری اسپتالوں میں بچوں میں ایچ آئی وی کے بڑھتے کیسز پر تشویش میں اضافہ ہوگیا ہے، جبکہ متاثرہ بچوں کے وکیل نے وفاقی حکومت سے معاملے کی شفاف تحقیقات کے لیے اعلیٰ سطح کی مشترکہ تحقیقاتی ٹیم (جے آئی ٹی) تشکیل دینے کا مطالبہ کیا ہے۔
متاثرہ بچوں کے مقدمات کی پیروی کرنے والے ایڈووکیٹ طارق منصور کے مطابق سندھ سوشل سیکیورٹی ولیکا اسپتال میں مبینہ طبی غفلت کے باعث 169 سے زائد بچے ایچ آئی وی سے متاثر ہوئے، جبکہ 9 بچوں کی اموات بھی رپورٹ ہوئی ہیں۔ انہوں نے خدشہ ظاہر کیا کہ متاثرہ بچوں کی تعداد مزید بڑھ سکتی ہے۔
وکیل نے مطالبہ کیا کہ وفاقی سطح پر آزادانہ تحقیقات کرائی جائیں تاکہ بچوں میں وائرس کے پھیلاؤ کی وجوہات، طبی طریقہ کار اور ممکنہ انتظامی غفلت کا تعین کیا جا سکے۔ ان کے مطابق تحقیقات میں متعلقہ اسپتالوں کے ریکارڈ اور طبی انتظامات کا بھی جائزہ لیا جانا چاہیے۔
انہوں نے متاثرہ بچوں کو علاج کی مکمل سہولیات فراہم کرنے، ان کے حقوق کے تحفظ اور ذمہ داران کا تعین کرنے کے لیے مؤثر اقدامات پر زور دیا۔
واضح رہے کہ طبی غفلت سے متعلق الزامات کی حتمی تصدیق کے لیے شفاف تحقیقات ضروری ہیں۔
سرکاری اسپتالوں میں ایچ آئی وی کے بڑھتے کیسز، طبی ایمرجنسی نافذ کرنے کا مطالبہ
