کوئٹہ:نیشنل پارٹی کے مرکزی رہنماء اور بلوچستان اسمبلی میں ڈپٹی پارلیمانی لیڈر میر رحمت صالح بلوچ نے پنجگور میں ڈینگی وائرس کے تیزی سے پھیلاؤ پر شدید تشویش کا اظہار کرتے ہوئے حکومتِ بلوچستان، یونیسیف اور عالمی ادارہ صحت (WHO) سے فوری طبی ٹیمیں روانہ کرنے اور ہنگامی اقدامات اٹھانے کا مطالبہ کیا ہے۔
انہوں نے کہا کہ حالیہ ہفتوں میں پنجگور میں ڈینگی کے کیسز میں غیر معمولی اضافہ دیکھا گیا ہے، جو کراچی، حب اور دیگر متاثرہ علاقوں سے آنے والے افراد کے ذریعے تیزی سے مقامی آبادی میں منتقل ہو رہا ہے۔
موسم کی تبدیلی نے اس وائرس کے پھیلاؤ کو مزید بڑھا دیا ہے۔
میر رحمت بلوچ کے مطابق ضلع پنجگور کے سرکاری اسپتالوں میں نہ تو ڈینگی ٹیسٹ کی سہولیات دستیاب ہیں، نہ ادویات، نہ ماہر طبی عملہ — جس کے باعث صورتِ حال خطرناک حد تک سنگین ہو چکی ہے۔
انہوں نے خبردار کیا کہ اگر فوری اقدامات نہ کیے گئے تو یہ وبا قیمتی انسانی جانیں نگل سکتی ہے۔
اقوام متحدہ اور حکومت بلوچستان سے اپیل
میر رحمت بلوچ نے یونیسیف اور عالمی ادارہ صحت (WHO) سے اپیل کی کہ وہ پنجگور کی تشویشناک صورتحال کا فوری نوٹس لیں اور:
اپنی طبی ٹیمیں روانہ کریں
ٹیسٹنگ کٹس فراہم کریں
اسپرے مہمات شروع کریں
اور ضروری امداد فوری بھیجیں
تاکہ وائرس پر بروقت قابو پایا جا سکے۔
پنجگور کو ڈینگی سے متاثرہ ضلع قرار دیا جائے
انہوں نے صوبائی حکومت سے مطالبہ کیا کہ پنجگور کو ڈینگی سے متاثرہ ضلع قرار دے کر ایمرجنسی نافذ کی جائے،
اور محکمہ صحت بلوچستان کو ہدایت دی کہ:
اسپرے مہم
صفائی
عوامی آگاہی
اور طبی سہولیات کی فراہمی
فوری طور پر یقینی بنائے۔
عوام کے نام پیغام
آخر میں میر رحمت صالح بلوچ نے عوام سے اپیل کی کہ وہ:
گھروں اور محلوں میں پانی جمع نہ ہونے دیں
مچھر دانیوں کا استعمال کریں
اور بخار یا دیگر علامات کی صورت میں فوری طبی امداد حاصل کریں
