زلزلے کے جھٹکوں سے بارکھان لرز اٹھا، کئی مکانات کو نقصان،

زلزلے کے جھٹکوں سے بارکھان لرز اٹھا، کئی مکانات کو نقصان، عوام کو احتیاطی تدابیر کی ہدایت

کوئٹہ (اولس نیوز) – بلوچستان کے ضلع بارکھان میں ہفتہ اور اتوار کی درمیانی شب رات 3 بجے زلزلے کے شدید جھٹکے محسوس کیے گئے، جن کی شدت 5.3 ریکٹر اسکیل ریکارڈ کی گئی۔ زلزلے کے بعد آفٹر شاکس (ضمنی جھٹکوں) کا سلسلہ جاری ہے۔

صبح 7:32 پر ایک اور شدید جھٹکا آیا، جس سے علاقے میں خوف و ہراس پھیل گیا۔ ابتدائی اطلاعات کے مطابق زلزلے کے باعث بارکھان کی مختلف یونین کونسلز، جن میں بغاو، رڑکن، چھپر اور رکنی شامل ہیں، کئی مٹی اور کچے مکانات کو جزوی نقصان پہنچا ہے۔

زلزلہ صرف بارکھان تک محدود نہیں

زلزلے کے جھٹکے بلوچستان کے دیگر اضلاع میں بھی محسوس کیے گئے جن میں موسیٰ خیل، لورالائی، دکی، کوہلو، ژوب، زیارت اور جزوی طور پر کوئٹہ شامل ہیں۔ اگرچہ ان اضلاع میں کسی بڑے جانی نقصان کی اطلاع نہیں ملی، مگر مقامی افراد نے گھروں سے باہر نکل کر رات کھلے آسمان تلے گزاری۔

ماہرین کی وارننگ: زمین کو توازن میں آنے میں وقت لگتا ہے

زلزلہ ماہرین نے خبردار کیا ہے کہ زمین کو نئی تبدیلی کے بعد توازن میں آنے میں 15 سے 20 دن لگ سکتے ہیں۔ اس دوران آفٹر شاکس (aftershocks) کا خطرہ رہتا ہے۔

عوام کے لیے حفاظتی ہدایات:

• مٹی یا کچے مکانات میں رہنے سے پرہیز کریں

• کھلی جگہوں پر رہائش کو ترجیح دیں

• زلزلے کے بعد کسی بھی قسم کی دراڑ یا کمزوری کی اطلاع مقامی انتظامیہ کو دیں

• گھبراہٹ سے بچیں، لیکن چوکنا رہیں

ریسکیو اور حکومتی اقدامات

اب تک کی معلومات کے مطابق متاثرہ علاقوں میں ضلعی انتظامیہ اور ریسکیو ٹیمیں متحرک ہو چکی ہیں، اور ابتدائی سروے کا کام جاری ہے۔ اولس نیوز نے کوشش کی ہے کہ محکمہ موسمیات اور PDMA بلوچستان سے بھی رابطہ قائم کیا جائے تاکہ مکمل معلومات عوام تک پہنچائی جا سکیں۔