بالی وڈ کے دبنگ اداکار سلمان خان نے اپنے خاندانی گھر گلیکسی اپارٹمنٹس، ممبئی میں بیڈ روم سے متعلق پراسرار واقعات کا انکشاف کیا ہے۔ اداکار کے مطابق انہیں اپنے کمرے میں کبھی مکمل طور پر اکیلے ہونے کا احساس نہیں ہوتا تھا، جبکہ کمرے کی لائٹس خودبخود جلنے بجھنے، الماری کھلنے اور میوزک بجنے جیسے واقعات بھی پیش آتے تھے۔
سلمان خان نے یہ دلچسپ انکشاف بھارتی فلم ساز کرن جوہر کے مقبول چیٹ شو ’کافی ود کرن 9‘ میں گفتگو کے دوران کیا، جہاں وہ پہلے مہمان کے طور پر شریک ہوئے۔ پروگرام میں دونوں شخصیات نے سلمان خان کی ذاتی زندگی، شادی اور ماضی کے مختلف واقعات پر گفتگو کی۔
گفتگو کے دوران کرن جوہر نے ماضی کا ایک واقعہ یاد کرتے ہوئے بتایا کہ وہ سلمان خان کو اپنی فلم ’کچھ کچھ ہوتا ہے‘ کا اسکرپٹ سنانے ان کے گھر گئے تھے۔ اس وقت سلمان خان فلم ’جب پیار کسی سے ہوتا ہے‘ کی شوٹنگ میں مصروف تھے، جس کے باعث انہوں نے کرن جوہر کو گھر بلا کر اسکرپٹ سنانے کا کہا تھا۔
کرن جوہر کے مطابق اس وقت سلمان خان کا پورا خاندان ایک ہی گھر میں رہتا تھا، جس میں ان کے والد سلیم خان، والدہ سلمیٰ خان، بھائی ارباز خان اور سہیل خان سمیت دیگر اہلِ خانہ بھی شامل تھے۔ انہوں نے بتایا کہ سلمان خان کا کمرہ گھر کے دیگر حصوں کے مقابلے میں کافی چھوٹا تھا، جہاں ایک بستر، الماری اور چند ضروری اشیا موجود تھیں۔
اسی دوران سلمان خان نے اپنے کمرے سے متعلق ایک حیران کن تجربہ بیان کرتے ہوئے کہا کہ انہیں وہاں ہمیشہ کسی نامعلوم موجودگی کا احساس ہوتا تھا، حالانکہ انہوں نے اس ہستی کو کبھی اپنی آنکھوں سے نہیں دیکھا تھا۔
اداکار کے مطابق جب وہ کمرے سے باہر آتے تو لائٹس خودبخود جلنے اور بجھنے لگتیں، الماری کھل جاتی اور بعض اوقات میوزک بھی خود ہی بجنے لگتا تھا۔ انہوں نے بتایا کہ باتھ روم میں موجود ہوتے ہوئے بھی انہیں محسوس ہوتا تھا کہ باہر کوئی ہے اور الماری کھول رہا ہے۔
سلمان خان نے مزید کہا کہ جب وہ میوزک سنتے یا چلاتے تو انہیں اپنے پیچھے کسی کے کھڑے ہونے کا احساس ہوتا تھا۔ ایسے میں وہ مذاقاً اس نامعلوم موجودگی سے پوچھتے کہ وہ کون سا میوزک سننا چاہتی ہے، پھر کوئی گانا چلا کر کمرے سے باہر نکل جاتے تھے۔
اداکار نے بتایا کہ گھر کے باہر بلیئرڈ کھیلنے کی میز بھی موجود تھی اور کھیل کے دوران بھی انہیں اپنے کمرے میں کسی کی موجودگی کا احساس ہوتا تھا۔
جب کرن جوہر نے سلمان خان سے پوچھا کہ کیا وہ ان واقعات سے ڈرتے تھے تو اداکار نے جواب دیا کہ وہ بالکل نہیں ڈرتے تھے، کیونکہ اس نامعلوم موجودگی نے کبھی انہیں نقصان نہیں پہنچایا۔ سلمان خان نے مزاحیہ انداز میں کہا کہ ان کی صرف یہی درخواست تھی کہ اگر وہ کوئی خوبصورت عورت ہے تو سامنے آکر خود کو دکھا دے۔
سلمان خان کی اس بات پر کرن جوہر بھی ہنس پڑے۔ اداکار کے اس انکشاف نے پروگرام میں ایک دلچسپ اور پراسرار صورتِ حال پیدا کر دی، تاہم بیان کیے گئے واقعات کی حقیقت کے بارے میں کوئی تصدیق سامنے نہیں آئی۔
بھارتی میڈیا رپورٹس کے مطابق سلمان خان کا خاندان 1970 کی دہائی میں ممبئی کے گلیکسی اپارٹمنٹس میں منتقل ہوا تھا، جبکہ بعد میں سلمان خان نے اسی عمارت میں نسبتاً سادہ رہائش اختیار کر لی۔
