کوئٹہ (اولس نیوز): کوئٹہ میں چند روز قبل شروع کی جانے والی جناح پیپلز ٹرین سروس حادثے کا شکار ہو کر کچلاک کے مقام پر پٹری سے اتر گئی۔
ذرائع کے مطابق ٹرین سروس کے آغاز کے کچھ ہی عرصے بعد پیش آنے والے اس واقعے نے منصوبے کے انتظامات، ٹریک اور حفاظتی اقدامات سے متعلق سوالات اٹھا دیے ہیں۔ واقعے کے باعث عوامی سفری منصوبے کی کارکردگی اور انتظامی نگرانی پر بھی تشویش کا اظہار کیا جا رہا ہے۔
ذرائع کے مطابق جناح پیپلز ٹرین منصوبے پر تقریباً 3 ارب روپے کی لاگت آئی ہے، جبکہ منصوبے کے تحت سریاب سے کچلاک تک 32 کلومیٹر ریلوے ٹریک کو اپ گریڈ کیا گیا اور سات اسٹیشنز پر مختلف ترقیاتی کام مکمل کیے گئے۔
ذرائع کا کہنا ہے کہ افتتاح کے چند ہی روز بعد ٹرین کا پٹری سے اترنا متعلقہ حکام کے لیے اہم سوالات کا باعث بن گیا ہے۔ عوامی حلقوں کی جانب سے مطالبہ کیا جا رہا ہے کہ حادثے کی وجوہات، ٹریک کی صورتحال اور حفاظتی انتظامات کا جائزہ لے کر حقائق سامنے لائے جائیں۔
واضح رہے کہ جناح پیپلز ٹرین سروس کا باقاعدہ افتتاح 29 ستمبر 2026 کو کیا گیا تھا اور اسے بلوچستان میں عوام کے لیے کم خرچ اور محفوظ سفری سہولت کے طور پر متعارف کرایا گیا تھا۔
