حبا فواد کے پروفائل میں “کاکڑ” لکھنے کے بعد بلوچستان کی شناخت پر نئی بحث چھڑ گئی

  کوئٹہ ( اولس نیوز ) فواد چوہدری کی اہلیہ حبا فواد نے اپنے ایکس (سابقہ ٹوئٹر) اکاؤنٹ پر اپنے نام کے ساتھ “کاکڑ” کا اضافہ کیا، جس کے بعد سوشل میڈیا پر مختلف تبصرے اور سوالات سامنے آنے لگے۔ متعدد صارفین نے پوچھا کہ آیا ان کا تعلق واقعی بلوچستان کے معروف پشتون قبیلے کاکڑ سے ہے یا یہ صرف ایک نئی شناخت کے طور پر اختیار کیا گیا ہے۔ تاحال حبا فواد نے اس معاملے پر کوئی تفصیلی وضاحت جاری نہیں کی۔ پاکستان کی سیاست میں یہ پہلا موقع نہیں کہ بلوچستان کی شناخت یا نشستوں کو لے کر بحث ہوئی ہو۔ ماضی میں بھی کئی سیاستدان ایسے رہے ہیں جن کی سیاسی یا خاندانی وابستگی کسی اور صوبے سے سمجھی جاتی تھی، مگر انہوں نے بلوچستان سے سیاسی نمائندگی حاصل کی۔ ان میں اعظم سواتی نمایاں ہیں، جو خیبرپختونخوا سے تعلق رکھنے کے باوجود بلوچستان سے سینیٹر منتخب ہوتے رہے۔ اسی طرح فیصل واوڈا، جن کی سیاست کا مرکز کراچی رہا، انہوں نے بھی بلوچستان سے سینیٹ کی نشست حاصل کی۔ سابق وفاقی وزیر داخلہ رحمان ملک بھی بلوچستان سے سینیٹر منتخب ہو چکے ہیں، حالانکہ ان کی سیاسی شناخت سندھ اور وفاقی سیاست سے وابستہ رہی ۔ حبا فواد کے پروفائل میں “کاکڑ” لکھنے کے بعد ایک بار پھر یہ بحث زور پکڑ گئی ہے کہ سیاسی اور سماجی شخصیات کی علاقائی یا قبائلی شناخت عوامی سطح پر کس حد تک اہمیت رکھتی ہے، تاہم اس معاملے میں حتمی رائے ان کی وضاحت سامنے آنے کے بعد ہی قائم کی جا سکتی ہے۔