نصیرآباد میں مبینہ مالیاتی اسکینڈل، اینٹی کرپشن کی اسپیشل ٹیم متحرک، متعدد محکموں کے ریکارڈ کی جانچ پڑتال

نصیرآباد: اینٹی کرپشن اسٹیبلشمنٹ بلوچستان کی اسپیشل ٹیم نے نصیرآباد کا دورہ کیا، جہاں مختلف سرکاری محکموں کی کارکردگی، ترقیاتی منصوبوں اور سرکاری ریکارڈ کا تفصیلی جائزہ لیا گیا۔
ذرائع کے مطابق اسپیشل ٹیم کے دورے کے دوران ایریگیشن، ایگریکلچر، مارکیٹ کمیٹی، ریونیو، لوکل گورنمنٹ اور دیگر سرکاری محکموں کے مختلف منصوبوں میں مبینہ طور پر بڑے پیمانے پر مالی بے ضابطگیوں اور کرپشن کے انکشافات سامنے آئے ہیں۔
ذرائع کا کہنا ہے کہ اسپیشل ٹیم نے متعلقہ محکموں کے ریکارڈ کا جائزہ لینے کے ساتھ ضروری دستاویزات بھی حاصل کر لی ہیں، جن کی جانچ پڑتال کے ذریعے مبینہ مالی بے ضابطگیوں کی نوعیت اور ذمہ داروں کا تعین کیا جا سکتا ہے۔
نصیرآباد میں سامنے آنے والے ان مبینہ انکشافات کے بعد ایک بڑے مالیاتی اسکینڈل کی تحقیقات کا دائرہ مزید وسیع ہونے کا امکان ظاہر کیا جا رہا ہے۔ تاہم، معاملے میں کسی فرد یا افسر کی ذمہ داری کا تعین تحقیقات اور متعلقہ شواہد کی بنیاد پر ہی ممکن ہوگا۔
اب دیکھنا یہ ہے کہ اینٹی کرپشن کی اسپیشل ٹیم کی تحقیقات میں مزید کیا انکشافات سامنے آتے ہیں اور مبینہ مالی بے ضابطگیوں کے ذمہ داروں کے خلاف کیا کارروائی کی جاتی ہے۔